حبیب موہاݨہ یکم جنوری ۱۹۶۹ء کوں ڈیرہ اسماعیل خان دے علاقے درابن وچ ڄمے، جیہڑے آپݨے منفرد قلمی ناں نال سرائیکی تے اردو ادب وچ پہچاݨے ویندن۔ انہاں نے گومل یونیورسٹی توں ایم اے انگریزی کیتا تے تعلیم و ادب دے سفر وچ اللہ لہیسی مونجھاں، سیتلاں دے داغ تے ادھوری نیند ڄیہے ادبی پندھ سرانجام ݙتے۔

ڄم پل تے تعلیم

حبیب موہاݨہ یکم جنوری ۱۹۶۹ء کوں ڈیرہ اسماعیل خان دی تحصیل درابن دے ہک گھرانے وچ مولاداد دے گھر پیدا تھئے۔ والدین انھاں دا ناں حبیب الرحمٰن رکھا، پر ادب دی دنیا وچ او “حبیب موہاݨہ” دے قلمی ناں نال مشہور تھئے۔ انھاں مڈھلی تعلیم اپݨے آبائی شہر درابن توں حاصل کیتی۔ ۱۹۸۷ء وچ میٹرک پاس کیتا تے تعلیم دا سلسلہ جاری رکھدے ہوئیں ۱۹۹۶ء وچ گومل یونیورسٹی توں انگلش لٹریچر وچ ایم اے دی ڈگری حاصل کیتی۔

روزگار تے ملازمت

حبیب موہاݨہ نے ۱۹۹۲ء وچ بطور پرائمری سکول ٹیچر اپݨے پیشہ ورانہ سفر دا آغاز کیتا۔ اپݨی محنت تے تعلیمی قابلیت دی بنیاد تے ۲۰۰۸ء وچ انھاں دی ترقی تھئی تے او انگلش دے لیکچرر بݨ ڳئے۔ اڄ کل وی او ایں عہدے تے فائز ہن تے نوکری دے نال نال علم و ادب دی خدمت وی کریندے پئے ہن۔

ادبی شعور تے حالاتِ زندگی

حبیب موہاݨہ کوں بچپن توں ہی شعر و ادب نال شغف ہئی۔ طالب علمی دے دور وچ ای انھاں ڈھیر سارے ناول تے افسانے پڑھ گھدے ہن۔ انھاں دے اندر دا لکھاری اس ویلے جاڳیا جݙاں انھاں اپݨے علاقے درابن دی خشک سالی، معاشی بدحالی تے غربت کوں قریب توں ݙٹھا۔ لوکاں دا پاݨی دی ہک ہک بوند کوں ترسݨ، خاندانی دشمنیاں تے کئی کئی ݙینہ چُلھے نہ بَلݨ جیہے حالات نے انھاں دے حساس دل کوں تڑپا ݙتا۔ انھاں حالات دا مقابلہ کرݨ کیتے انھاں قلم چایا تے اپݨے علاقے دی محرومیاں کوں کہاݨیاں دی شکل ݙیوݨ شروع کر ݙتی۔

ادبی پورہیا (تخلیقات)

حبیب موہاݨہ نے باقاعدہ لکھݨ دا مُڈھ ۲۰۰۴ء وچ اپݨی مادری زبان سرائیکی توں بدھا۔ انھاں دے ادبی پنڈے وچ اے شاہکار شامل ہن:

• اللہ لہیسی مونجھاں (۲۰۱۰ء): اے انھاں دا پہلا سرائیکی ناول ہے جیندے وچ دامان دی خشک سالی تے غریب طبقے دے مسئلیاں کوں ٻہوں سوہݨے انداز وچ بیان کیتا ڳئے۔
• سیتلاں دے داغ (۲۰۱۴ء): اے سرائیکی افسانیاں دا مجموعہ ہے جیندے وچ دیہاتی زندگی دے روپ ݙکھائے ڳن۔
• ادھوری نیند (۲۰۱۴ء): اے انھاں دا اردو افسانوی مجموعہ ہے، جیندے وچ وی دامان دے لوکاں دیاں سختیاں تے پریشانیاں کوں موضوع بݨایا ڳئے۔