قاسم عادل دستی

ڈیرہ غازی خان
سرائیکی شاعر

کجھ نمونہ کلام

اوندا حکم ہا سچ کوں سچ آکھݨ میں سچ دا سفر سدا کیتے

نمی ظالم دا ہمدرد بݨیا میں اپݨاں فرض ادا کیتے

نمی غلط کوں کہیں ݙینہ ٹھیک آکھیا نہ کہیں دے نال دغا کیتے

میݙی عادلؔ بخشش تھی گئی اے میݙی ذات تیں رحم خدا کیتے

ڄݙاں وی اوکوں اساݙی حالت تیں پیار آؤسن سرور ملسی

مدت دی مونجھی ایں دلڑی کوں وی قرار آؤسن سرور ملسی

قسم خدا دی میں ایں امیدبءچ گزار چھوڑیم حیاتی اپݨی

کݙاہیں تاں سکھ دے ایں زندگی وچ ݙینہوار آؤسن سرور ملسی

ایں نفرتیں دے بھریے بازار ءچ ڄݙاں محبت جوان تھیسی

اساݙے دل کوں تاں ہوں ݙیہاڑے قرار آؤسن سرور ملسی

ڄتھاں نئیں حوا دی ڄئی نچیندے ڄتھاں نئیں عزتاں پامال تھیندیاں

اساݙے سفریں دیوچ جے اینجھے بازار آؤسن سرور ملسی

اے سستی شہرت دے پیاسے شاعر ڄݙاں چھوڑیسن منافقت کوں

اساں جوانیں دی سوچ دیوچ معیار آؤسن سرور ملسی

میں جیندی سکءچ ستم دی سولی تیں جیندا نعرہ بلند ہے کیتا

ڄݙاں پلیسی او جامء کوثر خمار آؤسن سرور ملسی

کݙاہیں غریبیں دی کنڈ دا پگھر وی خشک تھیسی امید ہے پئی

کݙاہیں امیریں دے سر دے اتیں تغار آؤسن سرور ملسی

طلب تیݙی وچ بے چین دل ہے اکھیں وی مونجھاں اداس ݙسدین

ڄݙاں لہیسیں ا ساڈیاں مونجھاں قرار آؤسن سرور ملسی

ہے ساݙا مسئلک فقط محبت اساں ایں مسئلک کوں عام کرݨے

لوک ایں مسئلک دیوچ ڄݙاں بےشمار آؤسن سرور ملسی

اساں تاں کہیں ݙینہہ وی چھاں کریسوں کئی ساݙی چھاں تیں پگھر سکیسن

خزاں نہ رہسی ڄݙاں وی موسم بہار آؤسن سرور ملسی

بےجرم قیدءن میݙے پرندے بےظرف ظالم دی قید دیوچ

ڄݙاں وی خود کوں او اپݨے دیس ءچ اݙار آؤسن سرور ملسی

جتھاں روزانہ غریب لوکیں دے ٻال کسدن اتھاں وے عادل

ساݙے مجاہد امن دا قلعہ اسار آؤسن سرور ملسی