فیض احمد شازم
ڄاݨ سنڄاݨ
اصل ناں	فیض احمد
تخلص	شازم
ڄم پل	15 مئی 1985ء
تعلیم	ایم اے اردو
شعبہ	شاعری
زبان	سرائیکی، اردو
شہریت	پاکستانی
جھاہ پتہ	رحیم یار خان، پنجاب

ادبی خدمات

جناب فیض احمد شازم صاحب خوبصورت سرائیکی، اردو، سندھی تے پنجابی زبان اچ شاعری کریندن۔ پاکستان فلم انڈسٹری واسطے وی لکھئے پنجابی فلم ناگن اچ جناب دے لکھے گیت ھن ۔تے اردو فلم عشق مجاذ اچ وی جناب دے لکھیئے گیت ھن۔ݙوھاں فلماں ریلیز تھی چکن۔وسیب دے کئی مشہور گلوکاراں انہاں دے ݙوہڑے تے گیت وی اپݨی آواز اچ ریکارڈ کروائن۔محبتاں ونڈاوݨ آلے لوک ھن۔ مشاعراں اچ گھٹ ویندن۔

شازم سرائیکی سنگت پیر فتح دریا دے صدر وی ھن۔جناب امان اللہ ارشد دے شاگرد خاص ھن۔تعلیم ایم اے اردو کر رکھی نے۔ اے ڈگری انھاں اسلامیہ یونیورسٹی بہاولپور توں حاصل کیتی ھے۔

تصانیف

• مونجھ دا موسم
• شازم دے ݙوہڑے

نمونہ کلام:

قطعہ

آر کپیندن پار کپیندن

ݙے کے لکھ اعتبار کپیندن

دشمݨ تاں بدنام ھے شازم

یار دیاں پاڑاں یار کپیندن

---

ݙوہڑہ

تیڈے دل دی وسدی دنیا دے ارمان نسے انسان تاں ھیں

آئے شاھا تیݙی نگری دے دربان نسے انسان تاں ھیں

ھیسے رول فقیر اے سچ ھے پر سلطان نسے انسان تاں ھیں

تیݙے شازم پیت پوجاری ھیں تیݙی جان نسے انسان تاں ھیں

---

غزل

ست رنگی چُنی آلی لِیر دے مُرید ھیں

اساں ھِک مَنے تَنے پِیر دے مُرید ھیں

تختِ ھزارہ ساݙا سارا ھے مُرید پر

اساں ھک جھنگ والی ھِیر دے مُرید ھیں

عشق تیݙا پیر ھے تے عشق میݙا پیر

یار آپاں ݙوھاں ھِکے پِیر دے مُرید ھیں

ݙیکھ ڄئیں کوں چِٹا چِٹا چَن لُک ویندا ھے

اوں چَن چِٹے چِٹے کِھیر دے مُرید ھیں

نِکے لا توں ساکوں اُوندی اکھیں کیتا بیعت ھے

اساں اُوندے اول تے آخِیر دے مُرید ھیں

اساں پَنجتَنی ھاں تے بارھاں کوں مَنیدے ھیں

حیدری سݙیندے ھیں شَبِیر دے مُرید ھیں

شَازِم اساں دِل ڄیہی چیز دے غُلام ھیں

اساں لوک اپݨے ضَمِیر دے مُرید ھیں

---