غیور بخاری
بہاولپور ، پاکستان
مشہور سرائیکی شاعر
| غیور بخاری | |
| ڄاݨ سنڄاݨ | |
| اصل ناں | سید غیور الحسن بخاری |
| تخلص | غیور |
| ڄم پل | 4 اپریل 1983ء |احمد پور شرقیہ، بہاولپور |
| پیشہ | شاعر، نثر نگار |
| شہریت | پاکستان |
ادبی خدمات
سئیں غیور بخاری صاحب شاعر ابن الشاعر ہن انہاندے ابا سئیں سید پُر سوز بخاری وی اپنے زمانے دے معروف شاعر ہن۔ ایں واسطے آپ کوں شاعری ورثے وچ ملی ہے۔ لیکن غیور صاحب ہک جبلّی شاعر ہن۔ تہوں اوہ چھوٹی عمر اچ ای ایویں ݙہدیں ݙہدیں سرائیکی شاعری دے آسمان تے چمکن لڳ پئے۔انہاندے تخیلات دی پرواز بلند تے مشاہدہ بہوں تیز ہے ،غیور سئیں غزل دا مزاج شناس شاعر ہے تے اوندی غزل دے ہر شعر وچ بھرواں تاثر ہوندے۔
تصانیف
- 2009ء اچ انھاں دی پہلی کتاب: “‘عذاب خوابیں دے نال ہوندن”‘ چھپی.
- 2014ء وچ اُنھاں: “‘سِر دھرتی دی ویل”‘ سرائیکی وسوں کوں دان کیتی.
- 2016ء وچ “‘کجھ اَلا سانولا”‘ دے ناں نال اُنھاں دا مجموعہ کلام سامݨے آیا.
- 2018ء وچ “” ساکھ “‘ دی صورت اچ غیور بخاری وسیب کوں سوہݨی سوکھڑی ݙتی..
- 2021ء وچ اُنھاں دا پنجواں مجموعہ کلام “‘ حیاتی “‘ چھپ تے سامݨے آئے.
کجھ نمونہ کلام
قطعہ
| ایں سال سیالے وچ تیݙی وت مونجھ سیاݨی تھی ڳئی ءِ |
| تیݙے نہ آنوݨ دا سیئں سُݨ کے ایہ پگھرو پاݨی تھی ڳئی ءِ |
| ایں بے چینی دے عالم وچ کل شام جو گُزریاں شہر کنوں |
| میکوں پالے آ احساس ݙیوائے تیݙی شال پُراݨی تھی ڳئی ءِ |
غزل
| ݙسا وے سانول تیݙی اَساکوں جے مونجھ آوے تاں کیا کریجے |
| تیݙے وِچھوڑے دا ݙکھ اَساکوں جے آ ستاوے تاں کیا کریجے |
| اَساں فقیریں تے رنج نہ تھیویں اَساݙا کوئی قصور کائنی |
| خدا دی قسم اے تیݙی محبت نہ ہاں توں لَہوے تاں کیا کریجے |
| اَساں تیکوں جے بھُلا وی ݙیووں بھُلا کے خود کوں رُلا وی ݙیووں |
| مگر تیݙا حال چاہتیں دا کُئی آ سُݨاوے تاں کیا کریجے |
| وفا دے رنگیں دے وچ سجی ہوئی تیݙے خیالیں دی ایہ غزل وی |
| اُداس موسم دے وچ اَساکوں جے آ جگاوے تاں کیا کریجے |
| تیکوں بھُلاوݨ خدا دی قسم اے اَساں فقیریں دے ڈھول وَس نئیں |
| تیݙی ڳلی توں گذردیں ساݙا ایہ دل نہ راہوے تاں کیا کریجے |
| اَساکوں غیورؔ تیݙے غم بن کہیں دی بیعت قبول کائنی |
| مگر ایں ویلے وی کربلا وچ کُئی سِر لہاوے تاں کیا کریجے |
