عصمت گرماݨی
ڄاݨ سنڄاݨ
اصل ناں	عصمت اللہ
قلمی ناں	عصمت گرماݨی
ڄم پل	1970ء | وستی شاہ والی ،ڈاکخانہ نتکانی تحصیل تونسہ شریف
تعلیم	مڈل
پیشہ	ٹیکسٹائل مزدور
فن	سرائیکی شاعر
جھاہ پتہ	تونسہ شریف
شہریت	پاکستان

---

ادبی خدمات

شعری ادب دے حوالے نال تونسہ شریف کوں یونانِ صغیر آکھیا گئے۔جَون وی ایہ لفظ آکھ گئے بجا طور تے آکھ گئے۔علم و ادب دے حوالے نال بے شک تونسے دی دھرتی بہوں زر خیز ہے۔جئیں فیض تونسوی،فکرتونسوی ،رشید قیصرانی، ڈاکٹر طاہر تونسوی ،جھئیں عظیم لکھاری پیدا کیتے،تے اقبال سوکڑی جھئیں انقلابی شاعر کوں جنم ڈتا۔تے ایں کتاب دے سلسلے وچ حال اچ ای تحصیل تونسہ دے ہک نوجوان شاعر عصمت گرمانی دیاں غزلاں میکوں ملیاں تاں میں ڈیکھ کے حیران رہ گیم تے میکوں ایندے فنِ لطیفہ دا اعتراف کرناں پئے گیا جو واقعی عصمت گرمانی جوان جذبیں دا شاعر ہے، جیندے ہک ہک شعر وچ شعریت جھلکدی نظر آندی ہے۔بالخصوص اوہ غزل وڈی مہارت نال لکھدے تے غزل دے موضوعات اچ اوں وڈی وُسعت پیدا کیتی ہے۔جتھاں اوہ غمِ جاناں دی گالھ کریندے اتھاں اوہ غمِ روز گار دی گالھ وی کریندے۔جیویں جو ہک افلاس دی ماری پننی تے ہک محل دے مکین سردار زادے دے تناظر اچ اوں ہک شعر آکھئے ،جیڑھا جو زبان زدِ عام و خاص تھی چکے۔ عصمت گرماݨی سرائیکی زبان دا شاعر ہے۔

---

نمونہ کلام

غزل

میݙی غربت دے شیشے وچ میݙا ہر یار پرکھیا گئے

ڄیکوں پرکھݨ دی خواہش نائی اووہ غمخوار پرکھیا گئے

اساں اعتبار اپڑے تے ولا اعتبار نئیں کرݨا

ساݙا اعتبار کُوڑا ہا چلو اعتبار پرکھیا گئے

میں پنݨی ھم محل دے وچ میکوں ہک رات آ گئی ھے

میݙی اوقات پرکھی گئی اوندا کردار پرکھیا گئے

اساں تاں بس دیہاتڑ ہیں اساں چُپ چاپ لنگھ ویسوں

اے کتنا ظرف رکھدا ھے تیݙا بازار پرکھیا گئے

میں آکھیے دل کوں پرکھیے کوں ولا پرکھݨ دا کیا فائدہ

ولا دل دی میں من ٻیٹھاں ولا ہک وار پرکھیا گئے

ڄنہیں ادھ اچ آکے عصمت میݙی ٻیڑی کوں ٻوڑیا ہا

ہا او وی ناخدا میݙا انہائیں دی کار پرکھیا گئے

---

ݙوہڑہ

ساݙا غم ہے سنڳتی بدھݨے دا ساݙی مونجھ سہیلی ڄمدیں توں

ساݙے گھر کوں لیپے غربت دے مقروض حویلی ڄمدیں توں

ساݙے نک دے وچ مجبوریں دی بے رحم نکیلی ڄمدیں توں

اساں عصمت پیو دے قرضے وچ ہائیں خان دے ٻیلی ڄمدیں توں

---