شاکر مہروی سرائیکی زبان دا ٻہوں وݙا شاعر ہے۔

شاکر مہروی
ڄاݨ سنڄاݨ
اصل ناں	محمد رمضان
قلمی ناں	شاکر مہروی
تخلص	شاکر
ڄم پل	1966ء سناواں مظفرگڑھ، پاکستان
وفات	2010ء مظفر گڑھ پاکستان
اصناف ادب	شاعری
ذیلی اصناف	غزل، سرائیکی
کتاباں	چار
پہلی کتاب	میں یاد آساں
آخری کتاب	بس توں
مشہور کتاباں	میں یاد آساں، بس توں

---

ناں

اصل ناں محمد رمضان ہے۔ لیکن شاکر مہروی دے قلمی ناں توں لکھدے رھے ہن۔

---

ڄم پل

شاکر مہروی 19 جنوری 1966ء جمعہ دے ݙینہ 27 رمضان 1385ھ کوں حاجی غلام حسین ارائیں دے گھر مظفرگڑھ دے علاقے کھوہ آرائیں والا ’’ سناواں ‘‘ (کوٹ ادو) وچ ڄمے ہن۔

---

تعلیم

میٹرک تئیں پڑھے ہن۔ کجھ وقت ایجھا پھیر ݙتا ھے۔ شاکر صاحب میٹرک توں ودھ تعلیم نہیں کر سڳے۔

شاعری دا منڈھ

13 سال دی عمر اچ شاعری شروع کیتی۔ 1979ء اچ عظیم سرائیکی شاعر احمد خان طارق دی شاگردی اختیار کیتی تے پیر مہر علی شاہ دی مناسبت نال مہروی لکھدے رہن۔ انھاں ٻہوں سارے اعزازات، ایوارڈز تے سنداں گدیاں ہن۔ شاکر مہروی بطور شاعر ساری زندگی اپݨی دھرتی، اپݨی مٹی، اپݨی ماں ٻولی تے اپݨے وسیب کیتے کم کیتا ھے۔

ادبی کم کار

شاکر مہروی ساری اصنافِ ادب وچ لکھدے رھے ہن۔ لیکن شاکر مہروی دی وجہ شہرت گیت نگاری تے ݙوہڑے ہن۔ ݙوہڑاں دے ڄیڑھے چھوٹے کتابچے سامݨے آئے ہن۔ انھاں دی تعداد تقریباً 30 دے نال نال ہے۔ اے کتابچے عوام اچ ٻہوں پسند کیتے ویندے ہن۔ شاکر صاحب ٻہوں ساری سرائیکی ادبی سنگتاں دے سرپرست اعلیٰ بانی مبانی، جنرل سیکرٹری وی رہے ہن۔ شاکر مہروی صاحب احمد خان طارق سرائیکی ادبی ثقافتی سنگت سنانواں و پاکستان دے صدر رہے ہن تے بانی وی ہن۔ استاد محترم سئیں احمد خان طارق صاحب دے ناں توں سہ ماہی میگزین ”الطارق“ دا اجرا کیتا۔ ڄیں دے سرپرست شاکر مہروی صاحب آپ ہن۔ سوچ سنجاݨ سرائیکی ادبی سنگت شاہ صدر دین دے جنرل سیکٹری ہن تے ایں بزم دے بانی احمد خان طارق صاحب ہن۔

تصانیف

• میں یاد آساں
• ٻس توں
• شاکرمہروی دے ݙوھڑے
• طارق دے ڈوھڑے کلام(شاکرمہروی+احمد خان طارق)

---

وفات

26 فروری 2010ء کوں جمعہ دے ݙینہ فوت تھی ڳئے۔

---

کجھ نمونہ کلام

ݙوہڑہ

توں یاد رکھیں سُکھ سفریں وچ کُئی شے پئی کُھٹ میں یاد آساں

کہیں ثابت شے کوں کہیں ویلے لگا کہیں جاہ ٻٹ میں یاد آساں

یا شام کوں ولدے پکھیاں دا ݙٹھو کہیں جاہ جُٹ میں یاد آساں

تیݙے ہتھ دا شاکرؔ شیشہ ہاں ڄݙاں ویساں تُرٹ میں یاد آساں

---

ݙوہڑہ

توں نہ رس تیݙے روسے دا کائینات نئیں مل توں کیوں رسدئیں

ڄݙاں ڄاݨدا ہئیں تیݙی مسک بنا نئیں کھلدے پھل توں کیوں رسدئیں

رل ویسی تن دے صحرا وچ میݙی روح بلبل توں کیوں رسدئیں

انویں آکھ چا شاکر رل ونڄ توں میں وینداں رل توں کیوں رسدئیں

---

غزل

زندگی ھے سفر مختصر مختصر

میں وی کیتے مگر مختصر مختصر

آیا ساوݨ اݙاریں دا موسم ولیا

میݙے ڈھاندے ڳئے پر مختصر مختصر

میݙے دل توں لہو دے فوارے چھٹے

تیݙا رنگیں خنجر مختصر مختصر

تئیں تاں دل کوں تروڑئیے مروڑئیے ودا

ݙٹھے اللہ دا گھر مختصر مختصر

تئیں تاں پل وچ حشر دی ھے حشری کیتی

میݙا ݙیکھ ھاں حشر مختصر مختصر

تیݙے نکھڑݨ دیاں شانداں ھے ݙیندی رہی

تیݙی بھولی نظر مختصر مختصر

حال نکھڑݨ دے شاکر سنݨیندا تاں پئیں

ݙھیر لنمبڑ ناں کر مختصر مختصر

---