سید آزاد شاہ بخاری سرائیکی زبان دے ہک عظیم شاعر، نعت خوان تے سوز خوان ہن۔ سرائیکی وسیب دے معروف شاعر تے نعت خوان سید آزاد شاہ بخاری توں کوݨ واقف نئیں۔ تساں ہک ایجھی ہمہ جہت شخصیت ہن ڄنہاں نے اپݨی آواز تے شاعری دے ذریعے سرائیکی زبان کوں ہک نواں رنگ ݙتا۔

---

ڄم پل تے جیوݨ حال

آزاد شاہ بخاری صاحب 1941ء وچ مظفر گڑھ دے ہک چھوٹے جیہے علاقے سرکی (سلطان پور) وچ ڄمے ہن۔ انھاں دا تعلق سادات خاندان نال ہئی، ایہ وجہ ہے جو انھاں دی ڳالھ مھاڑ تے شاعری وچ اخلاق تے محبت دا خاص عنصر ݙسدا ھے۔

ادبی سفر تے شاعری

آزاد شاہ صاحب کوں اللہ سائیں نے ہک مخصوص سوز توں نوازیا ہئی۔ آزاد صرف صرف ہک شاعرینئیں بلکہ نعت خوانی تے سوز خوانی وچ وی اپنڑا ثانی نہ رکھدے ہن۔ انھاں دی شاعری وچ ݙوہڑے کوں خاص قدر حاصل ہے۔ انھاں دے ݙوہڑے وسیب دے درد، محبت تے عقیدت دی عکاسی کریندن۔

تصانیف

• آزاد شاہ دے ݙوہڑے
• کفن دی چھاں
• سانجھے درد
• عشق دی مئے
• بجھدا ݙیوا

خاص تصنیف: انھاں دی کتاب “آزاد شاہ دے ݙوہڑے” سرائیکی ادب دا ہک قیمتی سرمایہ سمجھی ویندی ہے۔

شہرت

آزاد صاحب ریڈیو پاکستان ملتان تے پی ٹی وی (PTV) دے ذریعے لکھاں دلیں وچ اپݨی جھاہ بݨائی۔انھا دا خاص اندازِ بیان اڄ وی انھاں دیی پہچاݨ ہے۔ وسیب دا کوئی ایجھا گھر نہ ہوسی جتھاں انھاں دی نعت یا ݙوہڑے دی کیسٹ نہ سݨی گئی ہووے۔

وفات

سرائیکی دا اے عظیم شاعر 2015ء کوں فوت تھی گیا، پر انھاں دا کلام اڄ وی زندہ ہے تے رہسی۔

---