انجم لاشاری
ڄاݨ سنڄاݨ
اصل ناں	سجاد الحسن
قلمی ناں	انجم لاشاری
ڄم پل	1956ء | احمد پور شرقیہ
فن	سرائیکی شاعر
شہریت	پاکستان

---

ڄم پل

انجم لاشاری دا اصل ناں سجاد الحسن ہئی۔ او 1956ء وچ ضلع بہاولپور دی تحصیل احمد پور شرقیہ دے وسوں محراب والا وچ پیدا تھئے ہن۔ انھاں دے ابا سائیں سفیر لاشاری وی سرائیکی دے ٻہوں وݙے شاعر ہن، جنھاں دیاں کئی کتاباں چھپ چکیاں ہن۔ گویا شاعری انھاں کوں ورثے وچ ملی ہئی۔

شعر تے ادب

انجم لاشاری نے صرف 18 سال دی عمر وچ شاعری تے افسانہ نگاری شروع کر ݙتی ہئی۔ انھاں دا شمار سرائیکی دے صفِ اول (پہلی تروڑی) دے افسانہ نگاراں وچ تھیندے۔ سرائیکی دے نال نال انھاں نے اردو وچ وی شاعری کیتی تے مضمون لکھے۔

صحافت

روزگار دے سلسلے وچ او 1984ء وچ کراچی چلے ڳئے، جتھاں انھاں نے “روزنامہ نوائے وقت” وچ بحیثیت سب ایڈیٹر کم شروع کیتا۔ بعد وچ او “روزنامہ جنگ” کراچی نال وابستہ تھی ڳئے۔

وفات

ادب دا اے چمکدا سورج 1996ء وچ صرف 40 سال دی عمر وچ کراچی وچ غروب تھی ڳیا۔ انھاں کوں انھاں دے آبائی علاقے محراب والا وچ سپردِ خاک کیتا ڳیا۔

تصانیف

انجم لاشاری دی وفات دے بعد انھاں دی سرائیکی شاعری دی کتاب ’’اکھیں سسیاں‘‘ چھپی، جیڑھی جو سرائیکی ادب دا ہک بیش قیمت سرمایہ ہے۔

---

نمونہ کلام

غزل

سوچ سکھݨی سنڄی آس آتی لڳے

اے حیاتی بھلا کیا حیاتی لڳے

ُروح گھارے کوں اکھ رووݨ ایجھی لڳے

تن دی روہی یکی بے براتی لڳے

شام شیشے تے یاداں دے اولوں لہن

سانجھ سانگے سنویں سنج سکاتی لڳے

چندر چاندی کلہیپے دا ڳاہݨاں بݨے

ساہ سینے کوں سونے دی کاتی لڳے

کل ٻکر وال ٹوبھے تے ایں کر پئے

ٻال رڑ کے جیویں ماء دی چھاتی لڳے

---